သိက္ခာချင်းလဲလှယ်ခြင်း

အချိန်အားဖြင့် ည ၇:၃၀
နေရာအားဖြင့် လှည်းတန်းကလမ်းဘေးမုန့်ဟင်းခါးဆိုင်တစ်ဆိုင်
လူငယ်လေးတစ်ယောက် မုန့်ဟင်းခါးထိုင်စားနေလေရဲ့။ ဝတ်စားထားပုံအရ တက္ကသိုလ်ကျောင်းသားလေး။ သပ်သပ်ရပ်ရပ်ရှိပြီး စိတ်ကောင်းစေတနာရှိမယ့်ရုပ်။

ထိုအချိန်တွင် အသက်၈နှစ်ခန့်အရွယ် ကလေးမလေးတစ်ယောက်က အသက်နှစ်နှစ်ခန့်အရွယ် ကလေးလေးတစ်ယောက်ကိုရင်ဘက်ခြမ်းကနေတစောင်းလေးပိုး။ လက်တစ်ဖက်က ခပ်နွမ်းနွမ်းအိတ်ကလေးတစ်လုံးကို ကျစ်ကျစ်ပါအောင်ဆုပ်ကိုင်ရင်း ကျန်လက်တစ်ဖက်ကိုဖြန့်ကာ ချိုသာယဉ်ကျေးတဲ့အသံယဲ့ယဲ့လေးနဲ့ ”သမီးကိုမုန့်ဖိုးလေးနဲနဲလောက်ပေးပါလား။ သမီးရောသမီးမောင်လေးရော ဘာမှမစားရသေးလို့ ဗိုက်ဆာလို့ပါ။”

ကျောင်းသားလေးကတော့ မျက်နှာမပျက်ဆက်စားနေတယ်။ သနားစဖွယ် ခခယယတောင်းပန်နေရှာတဲ့ကလေးမလေးကို လှည့်တောင်မကြည့်။ ရှိတယ်လို့တောင်မသတ်မှတ်ဘဲ မုန့်ဟင်းခါးကိုပဲခေါင်းမဖော်တမ်းစားနေတယ်။ နှစ်ခါသုံးခါလောက်မေးလာတော့ မော့တောင်မကြည့်ဘဲ ခေါင်းယမ်းပြလိုက်တယ်။ သဘောက မပေးနိုင်ဘူးပေါ့။ ကလေးမလေးမှာတော့ မျှော်လင့်ချက်ကြီးစွာနဲ့ သူ့ဘေးမှာရပ်စောင့်နေတုန်းပါပဲ။

မုန့်ဟင်းခါးစားပြီးတော့ ချက်ချင်းပဲ ပိုက်ဆံရှင်းပါတယ်။ မုန့်ဟင်းခါးဖိုးက ၇၀၀။ သူပေးလိုက်တာ ၁၀၀၀တန်လေး။ ၃၀၀ပြန်လာအမ်းတော့ ကလေးမလေးက မျှော်လင့်တကြီးကြည့်နေတုန်းပဲ။ အကြွေလေးများပေးခဲ့မလားပေါ့။ ဒါပေမယ့် လူငယ်လေးကတော့ ကလေးမလေးကိုဂရုမစိုက်ဘဲ ထွက်သွားတာပေါ့။ ကလေးမလေးမှာတော့ မုန့်ဟင်းခါးအကျန်လေးဖြစ်ဖြစ် စားရနိုးနိုး ပန်းကန်လေးကိုငုံ့ကြည့်လိုက်တဲ့အခါ နံနံပင်လေးတောင်ချန်မသွားပါဘူး။

ရက်စက်လိုက်တာ။ အကြွေလေးတစ်ရာနှစ်ရာပေးလိုက်တာ သူ့အတွက်ဘာနှစ်နာမှာမို့လို့လဲ။ စာနာစိတ်ခေါင်းပါးလိုက်တာ။ လူငယ်ဖြစ်ပြီး ဒီလောက်ကလေးတောင်ကူညီလိုစိတ်မရှိဘူးလား။ ဘေးကမြင်နေတဲ့လူတွေကတော့ အတွေးကိုယ်စီနဲ့ ယောက်ယက်ခတ်နေတာပေါ့။ ဒါပေမယ့် သူတို့မသိတဲ့အရာကတော့…

ကျောင်းသားလေးမှာ ပိုက်ဆံ၁၀၀၀ထဲရှိတာဖြစ်ပါတယ်။ မုန့်ဟင်းခါးကို အိုးဘဲဥထည့်စားရင် ၉၀၀ကျသွားမှာမို့ ဘဲဥကြိုက်ပေမယ့် ပဲကြော်နဲ့ပဲစားခဲ့ရတာပါ။ ကျန်တဲ့ ၃၀၀နဲ့ သူက ဘတ်စ်ကား နှစ်ဆင့်စီးရမှာပါ။ ဒါပေမယ့် လက်ထဲမှာ ၃၀၀ပဲကျန်တော့တာဖြစ်တဲ့အတွက် ဒုတိယအကြိမ်အတွက်ကို ၁၀၀ထဲထည့်ပြီး မျက်နှာပူစွာလိုက်စီးရမလား။ မစီးတော့ဘဲ ကျန်နေတဲ့၎မှတ်တိုင်ကို လမ်းပဲလျှောက်လိုက်ရမလားဆိုတာကို အသည်းအသန်စဉ်းစားနေတာကို သူတို့မသိတော့ပါဘူး။

နောက်တစ်ခုက…
ကလေးမလေး ကျစ်ကျစ်ပါအောင်ဆုပ်ကိုင်ထားတဲ့အိတ်စုတ်လေးမှာ တစ်သောင်းတန်သုံးရွက်။ ငါးထောင်တန်တစ်ရွက်။ တစ်ထောင်တန်လေးရွက်။ ငါးရာတန်တစ်ရွက်နဲ့ လုံးထွေးထားတဲ့ ၁၀၀တန် ၂၀၀တန် ၅၀တန် စတာတွေထည့်ထားတယ်ဆိုတာကိုလဲ လမ်းတစ်နေရာမှာ ကလေးမပိုက်ဆံထုတ်ရေနေတာကို ကိုယ်တိုင်တွေ့ခဲ့တဲ့ ကျနော်ကလွဲလို့ တခြားလူတွေက သိချင်မှသိကြမှာပေါ့လေ…

Leave a Reply

Your email address will not be published. Required fields are marked *