တို့ဆေးမိပြီး ပျောက်သွားသည့် ကျောက်ပန်းတောင်းသူ မိန်းကလေးကို ပြန်တွေ့

ကျောက်ပန်းတောင်းမြို့နယ်က တို့ဆေးမိပြီး ပျောက်သွားတဲ့ မိန်းကလေးကို အခု ပြန်တွေ့ပြီဖြစ်ပြီး ၀တ်ဆင်ထားတဲ့ ရွှေတွေတော့ ပါသွားတယ်လို့ ရွာလူကြီးတယောက်က ပြောပါတယ်။

ကျောက်ပန်းတောင်းမြို့နယ် လက်ပံပျားရွာက အသက် ၂၂ နှစ်အရွယ် မအေးမြလင်းဟာ ဇူလိုင် ၂၀ ရက်ညက ရွာကနေ ပျောက်သွားလို့ အဲဒါကို သူ့အဖေရဲ့ သူငယ်ချင်းက ဖေ့စ်ဘွတ်ခ်မှာ တင်ခဲ့ပြီး လူပေါင်း ၂၀၀၀၀ ကျော်က ပြန်ပြီးမျှဝေခဲ့ပါတယ်။

မိန်းကလေးဟာ ည ၈ နာရီလောက်က ကြက်ကြော်ရောင်းနေတဲ့ သူ့အမေဆီကို သွားနေတုန်း လမ်းမှာပဲ ပျောက်သွားခဲ့တာပါ။

လက်ပံပျားရွာလူကြီး ဦးရဲသူက “လမ်းမှာ ကားတစီးနဲ့လာတဲ့ မိန်းမကြီးတယောက်က တောင်ကြီးလမ်း ဘယ်ဘက်က သွားရလဲ မေးတယ်တဲ့။ သူက မသိဘူးဖြေပြီး သူ့ပခုံးကို ပုတ်လိုက်တာပဲ သိလိုက်တယ်။ တို့ဆေးမိတဲ့ပုံစံပေါ့’’ လို့ ပြောပါတယ်။

မိန်းကလေးဟာ ဇူလိုင် ၂၁ ရက် မနက်ပိုင်းကတော့ သူ့မိဘတွေဆီဖုန်းဆက်လာပြီး “အမေရေ သမီးကို လူတွေက ကားနဲ့ခေါ်သွားတာ ခု မန္တလေးအထွက်ဘက်ရောက်နေတယ်။ ဘယ်သွားနေတာလဲ မသိဘူး။ ကိုယ်မှာပါတဲ့ ရွှေတွေလည်း မရှိတော့ဘူး” ဆိုပြီး ဖုန်းချသွားတယ် မိဘတွေက ချက်ချင်း ပြန်ဆက်တော့ ဖုန်းက စက်ပိတ်သွားတယ်’’ လို့ ပျောက်ဆုံးတဲ့ အကြောင်းရေးထားတဲ့ ပို့စ်မှာ ဖော်ပြထားပါတယ်။

ဦးရဲသူက “ကလေးမ ပြန်ပြောပြတာကတော့ မနက်ကျတော့ အမြန်လမ်းဘေး တောင်ညိုရွာနားမှာ သူရောက်နေတယ်။ အဲမှာ တဲတလုံးနဲ့ အဘိုးကြီးတယောက်တွေ့လို့ အကျိုးအကြောင်းရှင်းပြပြီး ဖုန်းဆက်ခွင့်တောင်းတော့ ဆက်လို့ရတယ်။ ဒါပေမယ့် ဖုန်းက မကောင်းတော့ ဆက်ပြီးတာနဲ့ ကျသွားတာ။ ဒါနဲ့ပဲ အဘိုးကြီးက သူ့ကို ကားတစီးနဲ့တင်ပေးလိုက်တယ်။ ဒီမနက်မှာတော့ သီးကုန်းကိုရောက်တယ်။ သူ့ရင်ဘတ်ထဲမှာ ငွေ ၂၀၀၀ ရှိနေတော့ ဆိုင်ကယ်တက္ကစီခေါ်ပြီး မိတ္ထီလာရဲရုံးကို ပို့ခိုင်းတယ်။ ကျနော်တို့ဆီကို မိတ္ထီလာခရိုင်ရဲရုံးက ဆက်သွယ်လာတာပါ’’ လို့ ပြောပါတယ်။

ဒီဗွီဘီက မိတ္ထီလာခရိုင်ရဲရုံးကို ဆက်သွယ်ကြည့်ရာမှာတော့ မိန်းကလေးဟာ ဆိုင်ကယ်တက္ကစီနဲ့ ရောက်လာခဲ့ပြီး သူတို့က မိဘတွေဆီ ဆက်သွယ်ပေးထားလို့ လာခေါ်သွားပြီလို့ တာဝန်ကျ ရဲတပ်ဖွဲ့ဝင်က ပြောပါတယ်။

ဒီမိန်းကလေးဟာ တခြားပတ်သက်သူမရှိဘဲ မိဘတွေနဲ့သဘောတူထားသူရှိတယ်လို့ ဦးရဲသူက ပြောပါတယ်။

“သူ့မှာ တခြားပတ်သက်တာ မရှိဘူး။ တယောက်ပဲ။ စေ့စပ်ထားတဲ့သဘောပေါ့။ သူ့ဆီကိုလည်း ရောက်မလာလို့ လူကုန်ကူးရဲတပ်ဖွဲ့ဆီကိုတောင် အကြောင်းကြားထားတာ။ အခုပြန်တွေ့တော့ ကျန်းကျန်းမာမာပါပဲ။ ကိုယ်မှာပါတဲ့ ဆွဲကြိုးရယ်၊ နားတောင်း၊ ဆွဲသီးကတော့ မရှိတော့ဘူး’’ လို့ ပြောပါတယ်။

Source DVB

Leave a Reply

Your email address will not be published. Required fields are marked *